Sot, në hapësirat e Komunës së Mitrovicës Veriore, është mbajtur një takim pune ndërmjet drejtorit të Drejtorisë për Siguri dhe Emergjenca të Mitrovicës së Jugut, z. Bahtir Maxhuni dhe drejtorit të Drejtorisë për Siguri dhe Emergjenca në Mitrovicën Veriore, z. Tahir Mikullovci, me bashkëpunëtorë.
Qëllimi i takimit ishte forcimi i bashkëpunimit ndërinstitucional në fushën e sigurisë dhe menaxhimit të emergjencave.
Palët diskutuan për mundësinë e koordinimit më të mirë në rastet e situatave emergjente, zhvillimin e trajnimeve të përbashkëta, si dhe shkëmbimin e informacioneve në kohë reale.
Të dy palët u pajtuan për thellimin e bashkëpunimit dhe organizimin e takimeve të rregullta me qëllim të përmirësimit të shërbimeve ndaj qytetarëve të të dy komunave.
