Me shumë aktivitete Komuna e Mitrovicës Veriore ka shënuar 17 shkurtin ditën e Pavarsisë së Kosovës. Panairi i Trashëgimisë Kulturore” Vlera që na bashkon” i realizuar për herë të parë në këtë komunë, ishte një prej aktiviteteve kryesore që shënuan Ditën e Pavarësisë. Ky aktivitet tre-ditor, i mbështetur nga Komuna e Mitrovicës Veriore në bashkëpunim me organizatën Business Women Mitrovica, ofroi një mundësi unike për vizitorët që të njihen me veshjet tradicionale kombëtare, ushqimet tipike dhe produkte të tjera kulturore që pasqyrojnë trashëgiminë dhe identitetin kombëtar.
Në vazhdën e aktiviteteve, u zhvilluan takime me nxënësit e shkollave fillore nga Mitrovica Veriore, të cilët kishin mundësinë të realizonin punime artistike me motive të lidhura me Ditën e Pavarësisë, duke kontribuar kështu në ruajtjen dhe promovimin e vlerave kulturore dhe historike të Kosovës. Këto aktivitete janë një mundësi e shkëlqyer për të fuqizuar edukimin dhe ndërgjegjësimin e brezave të rinj lidhur me rëndësinë e ngjarjeve historike, duke e festuar Ditën e Pavarësisë në një atmosferë të pasur me kulturë dhe tradita.
