Mitrovica Veriore – Qyteti i Rock-ut!
Një vepër arti që flet me gjuhën e muzikës është tashmë pjesë e muraleve ikonike të Mitrovicës Veriore, qytetit me histori të pasur kulturore dhe shpirt të gjallë artistik. Në zemër të qytetit është realizuar një mural dedikuar legjendës botërore të muzikës rock, Joe Satriani, një prej kitaristëve më të mëdhenj të të gjitha kohërave.
Ky mural nuk është thjesht ngjyrë në mur, është një simbol i gjallë i dashurisë së qytetarëve të Mitrovicës Veriore për muzikën rock, një trashëgimi që na përkujton se ky qytet ka qenë, është, dhe do të mbetet gjithmonë i lidhur ngushtë me artin dhe muzikën.
Ky projekt u mundësua me mbështetjen dhe financimin e veçantë nga Arianit Besiri, Kryetar i Komunës së Morbachut në Gjermani në bashkëpunim me Kryetarin e Komunës së Mitrovicës Veriore z. Erden Atiq dhe Drejtoresha për Kulturë, rini dhe sport znj. Arta Azemi.
Murali është realizuar nga artistët Bardhyl Sh. Dobroshi, Dea Gaxha dhe Albion Mehmedi, të cilët sollën në jetë këtë vepër me shumë përkushtim e kreativitet.
